क्रान्ति अर्याल
स्याङ्जा ,१९ जेठ । भविष्यका कर्णधार बालबालिकामा सृजनात्मक अभिव्यक्तिको विकास गराउने उद्देश्यले गण्डकी प्रदेश सरकार अन्तर्गत सामाजिक विकास कार्यालय, स्याङ्जाको आयोजनामा स्याङ्जाका १० स्थानीय तहमा सिर्जनात्मक लेखन प्रतियोगिता सम्पन्न भएको छ ।
गल्याङ नगरपालिकामा आयोजित प्रतियोगिता “गण्डकी प्रदेशमा पर्यटनको सम्भावना, समस्या र चुनौती” शीर्षकमा केन्द्रित थियो । यस प्रतियोगितामा जानकी माविकी छात्रा तारा सारुले प्रथम स्थान हासिल गर्दै जिल्ला स्तरीय प्रतिस्पर्धाका लागि छनोट भएकी छन् । त्यस्तै भानुभक्त माविका प्राञ्जल भण्डारी दोस्रो र चिराग आवासीय माविकी रन्जु मस्राङ्गी तेस्रो स्थानमा रहेका छन् भने सार्वजनिक माविकी माण्डकी बस्यालले सान्त्वना स्थान हासिल गरेकी छन् ।
यो प्रतियोगिता स्याङ्जाका वालिङ, चापाकोट, भीरकोट, गल्याङ नगरपालिका सहित बिरुवा, अर्जुनचौपारी, आँधीखोला, हरिनाश, फेँदिखोला र कालीगण्डकी गाउँपालिकामा सम्पन्न भइसकेको छ ।
सामाजिक विकास कार्यालय स्याङ्जाका प्रमुख जीवन पौडेलका अनुसार पालिकाबाट छनोट भएका उत्कृष्ट तीन प्रतिस्पर्धीहरू सहित ३३ जना विद्यार्थीहरूले जिल्लास्तरीय प्रतियोगितामा भाग लिने छन् ।
जिल्लास्तरीय प्रतियोगिता यही जेठ २२ गते आयोजना हुने भएको छ ।
बालबालिकाको सिर्जनात्मक क्षमताको पहिचान गर्दै भविष्यमा पनि यस्ता प्रतियोगितालाई निरन्तरता दिइने आयोजकले जनाएको छ ।
